Tgk Bantacut A.Siti Fatimah

 

Tgk Bantacut A.Siti Fatimah adalah seorang penyair terkenaldari Kampung Kutelintang, Kec. Pegasing, Kabupaten Aceh Tengah.

Syair-syairnya dalam bahasa Gayo sering dikumandangkan grup syair yang terdapat di Aceh Tengah.

Dalam buku bunga rampai ini dimuat syairnya:

 

Peringeten Kujema si Murip

Wo Sudere

Ama Ine

Bujang Jauh

Buke Penawaran

Delah Paseh

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Bantacut A. Siti Fatimah

 

PERINGETEN KU JEMA SI MUREP

(Kullu Napsen Jangan Ikatul Maut)

 

Ini peringeten ku jema si murep

Entiko galip berlale sabe

Sikerna murep mu nge iperin Allah

Si turah-turah murasai mate

 

Enti mulo kite umet Muhammad

Salangkan Malaikat oya pe bese

Sitengah murep gelah inget-inget

Beramal ibuet enti ko lale

 

Si kerna ibedet urum mununtut

Malikul maut ara susahe

Anggota maut tujuhe bewene mujeweb

Si kerna kuet mununtut sabe

 

Irai terkumu oya pe berdawe

Si kerna munuke kitep si dele

Irai tar awah oyape berdawe

Si kerna mubaca ilmu penane

 

Irai ter beden oya pe kiset

Si kerna peninget iwnni ate

Renyel ulak ku Tuhen mungadu

Oya Tuhen ku jema sara pake

 

Gere mera kuueten nyawae

Bewene berdawa anggota tujuhe

Iyosah Tuhen keta sara surete

Munuruhen nikmat kusi male mate

 

Ituruh  nikmat oya le serge

Ku jema si suke mununtut sabe

O ku bewen mu umet ni Nabi

Keta mununtut mi ku jema sipane

 

Mununtut ilmu enti berede

Nge sawah ku tue melengkan nge mate

Keti berbahagie dinie akherat

Kati selamat sawah ku mate

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Bantacut A. Siti Fatimah

 

WO SUDERE

 

Wo suderengku pengen ku sederen

Urusen persatuen male ku cerite

Kite bersatu galak di ateni Nabi

Mudemu rezeki ari penosah ni Tuhente

 

Bersatu kite gelah musara pakat

Musara tempat murum ku ini

Bersatu kite gelah lagu lebah

Munawos umah ku kayu rubu

 

Gelah bersatu kite lagu kentes

Remalan berbaris ku tempat si tuju

Bersatu kite gelah lagu onek

Urum-urum kedek mumangan madu

 

Bersatu kite gelah lagu lebah

Sara mukunah bewene muserbu

Terutama kusawahan ku Bapak bene

Si kerna campur munorum ni kami

 

Jerih payahe gere terbeles kami

Ku Tuhen ilahi si nguk kami serahan

Kami tiro tulung enti muhehali

Ku Tuhen ilahi si nguk kami serahan

 

Oyale mulo sara amanat

Kadang ara si kurang hormat

Gelah bersimaapan mi . . .

 

 

 

 

 

 

 

Tgk Bantacut Aman Siti Fatimah

 

AMA INE

 

Man arda walidaihi pakad

Ardallah waman ashata

Walidaihi paka asha dallah

 

Nabi Muhammad ara berwaksiet

Kukite umet rata sekeliyen

Kekin ama ine berate rela

Ku Allah ta ala serasa berimen

 

Keku ama ine berbuet salah

Serasa ku Allah kite berileten

Segele ibedet gere berterime

Ike ama ine ibuang ayahan

 

Ike ama ine kase bercerak

Ku atas anak wajeb ipengenen

Segele perintah turah ipateh

Urum ate jernih renyel ibueten

 

Ku ama ine bersipet sayang

Jeroh ipanang enti turun seliben

 

Munengon anak bergalak ate

Biyer hartae berugi simen

Niyet ni ate we enge le sawah

Munanten teridah ari anak belesen

 

Umpama senuen munantinen umah

Ibarat bernemah munantinen ringen

Ara teba anak emeh pedi lagu

Itawose karu la bermacam jelen

 

Ara relaman lagu si mugerdak

Ike bercerak turun seliben

Wae berkenak kati ku jawe

Urum ama ine jema mukeleh kuren

 

Renyel berpikir ama urum ine

Kananti dewe gelah mi jawenen

Lagu ni anak bewene rela

Kemel kin jema si kiri kuen

 

Nge sesudah jawe anak urum ine

Renyel we lupe kin kewajebpen

Renyel idaten ine merah-erah

Sikerna nge longoh payung pelongohen

 

Berubah sayang

Mutuker galak

Sikerna nge kolak

Daleng seserenen

 

Urum ama ine renyel musirang

Sikerna terang cahaya ni ulen

Segele cerak ke gere ne terpateh

Sikerna enge jernih telege teteduken

 

Isone ama ine renyel bersebuku

Munungkukken ulu eluh bercucuren

Mungawul ni anak aduhe suker nyanyae

Ini rupen belese naku tareng tulen

 

Renyel ku nasip ine bertumpu

Uwo nasip ku mupetimang liwen

Ke kucak ke nge kaul konotte nge naru

Ku beden tubuh ku sempat ewe lupen

 

Tengah we kucak berdoa aku

Buge anak ku berbudi puren

Rupen tenirong ku gere musampe

Silagu ni pake si kiri kuwen

 

Beta la sebuku

Ari ama ine

Kesengkiren kite

Berubah pikiren

 

Uwo suderengku si mubahgie

Kin ama ine kire enti lupen

Membeles budi payah nama ine

Gere daleh koro kude si terbilang simen

 

Ike urum cerak jeroh urum peri lemut

Sekaliyen rukut serasa iken

Asa atewe pedi enti rusak

Ike emas pirak temas iyarannan

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Bantacut Aman Siti Fatimah

 

BUJANG JAUH

 

Tengku wo o o o enti ne lale

 

Bujang jauh si nge beluh mokot

Beluh pe mongot wani sarah kata

Muningetti denie kase nge mokot

Denie bererot mununung masa

 

Besilo resam si olok mulumpeti

Munentang edet semata-mata

Apabile resam kin ulu ni buet

Nge ringen seriet kurang agama

 

Ike edet ibobon kin penikot

Nge mupat sipet jengkal urum seta

Ike kin are ilen kite munyuket

Waktu ku hakiket nge turah kona

 

Isi ni dunie besilo nge pedet

Timur urum barat nge pedet

Oya bewene ku Tuhen muninget

Kuet mi ibedet ampun mi dosa

 

Ike isi ni dunie kase nge tubed

Bacar mi muninget isie nge leta

Oyale jama si galak kin maksiyet

Nge tangkuh ku deret we kin ulu dowa

 

Bujang pujangga munaringen mana

Hukum urum edet gere kalah masa

Naru kin penegu konot kin penikot

Oya sara kalimat tareng kin pusaka

 

Iyuwet si murege itimang si beret

Oya tubuh ni edet enti ko salah sangka

Cube isenyalis wan sesara buet

Lagu benang siret ara jejeb mata

 

Ike nical ekeng ikene melo peded

Oya tubuh ni inget iyaman sedanga

Naru konotte e Bantacut Aman Siti Fatimah

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Bantacut Aman Siti Fatimah

 

BUKE PETAWARAN

 

Turun mi turun buke petawaran

Urum tertib sopan ari P K K

Terime kasih kami ucapkan

Sara kemajuen terhadap wanita

 

Pakad jeroh kami tetepen

Lagu resam jemen simale kite bina

Yang  pertama urusen pekayan

Enti berkelebihen si mucolok mata

 

Yang  kedue bahan makanan

Perlu itingketen ari si nge ara

Ike lepat gayoni juara harapan

Urum cecah reraya iyetong pusaka

 

Letakan cerite ku alas kertan

Alas kenonolen hasil ari paya

Bernung tetonyung benyet pelkahan

Morep mu pantas iwani paya

 

Oya le tengkah ni bengkuang gewat

Tengkahe dekat ku kite nge kona

Ike reta pinyem upuhte mampat

Gere si karat buet lagu noya

 

Genap mi mulo kati singket-singket

Porami isemet ku arapan pora

Si tareng maring gere kamu inget

Malum le sipet ni manusie

 

 

 

 

 

 

 

 

 

 

Tgk Bantacut Aman Siti Fatimah

 

DELAH PASEH

 

Ahlamdulillah Rabbil alamin

Puji kami si enge ku Tuhen mulie

Askuru lillah miyen tar pemaren

Syukur urum paken kami kin ningko

 

Morep idunie munurut pejanyin

Hine urum miskin silep urum lupe

Sedet tauhed mulo kite perin

Urum ate mukmin sara resie

 

Due poluh lime Nabi tar pemarin

Muhammad Amin gerelle pemulo

Mengadu rahmatan lel alamin

Nabi kin pemimpin seluruh denie

 

Dua kalimah syahdat singuk menjamen

Enti kusi lain pe jawad ni kekire

Salat syembahyang singe kite deren

Lahir urum bathen ku Tuhen muniro

 

Iyosah Tuhen mi kase pembelesen

Muah mi senuen gelah renah reno

Iyosah Tuhen mi kase pembelesen

Tetap mi imen iwani dede

 

Zakat pitrah oya kin tenonen

Kin weh nenerin ganti ni telege

Penyuci ni beden lahir urum bathin

Urum paker miskin jurah berjangko

 

 

 

 

 

 

Reff

Urum delah paseh                   rie takabur

Ate gelah mukmin           siturah itonen

Siturah berderen            oya najes baten

Ku hukum si lime                     iwani dede

 

Puasa sebulen gelah licin

Sara teteten dene ku serge

Ari awal pemulo sawah ku pemaren

Enti ara ezen serlo rowa lao

 

Kelime haji rukum tar pamaren

Oya kati perin tanoh mulie

Harus beribadah gere ara laen

Si nguk iperin kelem porak lao

 

Isone nge mubayang lahir urum bathin

Siturah kite perin sana salahte

Bermacam ujien deledi kejadinen

Tuhen kin pemimpin kusi sangkante

Gere tertonnen kesanah pe resie

 

Belang padang Maksar gere ara mukayu

Male bersilu kayu pe gere ara

Ibelang arapah mongot pedederu

Lagu si mudemu bayang ni ku mata

 

Urum delah paseh

Ate gelah mukmin

 

Siturah berderen

Ku rukun si lime