Tgk Ali Hasan Aman Suaiba

Tgk Ali Hasan Aman Suaiba adalah seorang penyair terkenal di Aceh Tengah. Dia  mencipta syair dalam bahasa Gayo. Selain mencipta syair ia  juga sering membawakan puisinya didepan umum dalam suatu grup di Kampung Kutelintang. 

Pekerjaan sehari-hari  sebagai  petani.

Didalam buku bunga rampai ini dimuat dimuat syairnya: 

                                  Menuntut Ilmu

                                  Kewajiban Kita Beragama

                                  Sarat Islam

                                  Alam

                                   Gerelni Nabi

                                   Semiang

                                   Bersyukur

                                   Tobatmi Tobat

                                   Apabile Mate Anak Edem

                                   Edep Sopan Santun

                                   Kiteb Siturunni Tuhen

 

 

 

 

 

 

 

        Tgk  Ali Hasan Aman Suaiba

          

          MUNUTUT ILMU

 

Rasulullah telah berkata

Kubewenne jema rata kemana tue urum mude

Si kerna mununtut iwajeb ni Tuhente

Gere enguk gere si berjiwe bewene manusie

 

Jema si mununtut nge iperinni Tuhen

Selamat berjelen renyel ijanyin kuwanni serge

Hukume wajib turah ibueten ike gere beriroto

Dosa ku Tuhen nge berlipet gende

 

Jema berilmu temas moreppe

Nguk ibedane rugi lebe iaran iwanni dede

Jema berilmu kunul tar uken

Kudurun ibobon nge bertompoken jema sigere

 

Akherat dunie turah urum ilmu paneni

Temas murippe lagi derzete mujadi mulie

Minyak urum waih enguk iyorumen

Oyale tamsillen buge kin pikiren rata bewene

 

Bier semiyang turah urum ilmu

Kati mutuju renyel selalu terime Tuhenten

Listrik kapal terbang itaos jema

Siturahe ara minnos oya ilmu wanni dede

 

Cube kite engon ara ikite ni pemikir ni heme

Mununtut ilmu mulo ari laheren

Sawah kutue beden sawah ku kuburen baru semperne

 

I kurnie Tuhen segele perbueten ngeke ijelenen

Tentang perbueteten masa idunie

Ike gere ijelenen kite nge mukemat

Renyel berangkat renyel musapat ku neraka isude

 

Sikerna bedeni nge memakin tue (seme)

Gere mehat hinge pintu kubur buruke tetap

Sikerna denie ni tempat singahan

Akherat ni Tuhen nge isedien kusekien manusie

 

Kegere ilmu bewene pedem wan gelep gelie

Lagu tengah melem gere teroboh munengon

Karna manusie iyosah Tuhen akal

Enti itetekar enti ikekemar atan denie

 

Segele perbueten munurut niete

Allah mumerenne nge terang selese wan Quran mulie

Oyale cerak ni Nabi Muhammad si enti galep lale

Tengah ara nyawae iwani rembege

 

 

 

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

KEWAJIBAN KITA BERAGAMA

 

Ara kewajipen kite beragama

Kujewepen pora si turahe

Ara kite beragama

 

Sana kinen arti ni agama

Peraturen ni Allah Taala

Suruh urum kowa kukite kona

 

Sana kinen minsel le suruh ari Tuhen

Semiyang ibueten puasa Ramadhan

Munentun puasa

 

Sana kinen minsel ni larangan ari Rabbi

Munusuh bejudi kuama ine diri

Enti daruhaka

 

Sahan kinen Tuhenmu si wajib I semah

Oyale Tuhen Allah si sabi munerah

Buet ni jema

 

Berbilang-bilang ka bilang ni Tuhenmu

Tuhen ni kami satu gere ara berjudu

Melengkan Saturda

 

Ike ara rowa kase kune

Tentu galep berdewe

Langit dune tentu gere ara

 

Ike rowa tulu ara ke ilen berkuasa

Gere ne ara sebeb nge berkerowa

Tentu nge dawi dawa

 

Sana kinen si perin alam dunie

Selain ari Tuhen te sekelien bene

Meh sapun sapa

 

Sinting ke alam ni bersifet baharu

Oya nge terang tentu

Batat kayu atu meh benasa

 

Ara ke Tuhen berama ine

Oya nge terang gere melengkan

Tuhen tetap tungel sara

 

Sahan keta Tuhen si mujadinne

Gere ara sahan pe

Nge beta zette Tuhen berkuasa

 

Ara ke Tuhen berbuah hati

Tuhen gere beristeri gere mu abang engi

Gere mu ine ama

 

Kemuduk nari oya sahan nabinte

Nabi Muhammad

Nabi mulie lagi sentosa

 

Selo ken lahir ni Nabi Muhammad sibenare

Due belas Rabiul awal si enge terkenal

Lagi terhola

 

Ike tahun Masehi aku ragu-ragu

Oya nge terang tentu

Tahun 1571 due puluh bulen empat ta

 

Suel jeweb bang mulo kite

Wo sudere perkara thohed

 

 

 

 

 

 

 

 

Tgk Ali Hasan Aman Suaiba

 

SARAT ISLAM

 

Warape syarat Islam ara opat perkara

Pengen mi keta gelah selese

Pertama seber kin hukum ni Allah ta ala

Ho heme Allah rata bewenne

 

Semiyang lime waktu wajeb ibueten

Oya hukum ni Tuhen ku urang Islam sedang

Semiyang soboh tetir kite uet

Ari atan kasur lemut enti ne nome

 

Mejen-mejen arawa kemaro

Sehinge senuwente meh layu ulungge

Jemasi seber depet kemenangan

Beta le Tuhen terang mu meren ne

 

Yang  kedue turah kite rela

Kin rintah ni Allah ta ala rata bewenne

Ibarat kite isoruh mungaji

Ku laki isteri wajeb ukum menjadi

 

Rintah ni Allah ta ala turah ibueten

Ke gere berileten iakherat kase

Dunie akherat turah urum ilmu

Ke gere nge karu morep urum mate

 

Ketige yaken urum ikhlas

Kati renyel pantas Tuhen munerimee

Ibarat kite bersedekah ringit

Enti ijejangkit kuarap ni pake

 

Beribedet kite enti karna jema

Siturahe ara ikhlas wani ate

Ini keta ku tamahan mien

Si mubinasanan Islam ara opat macame

 

Pertama mubueten si gere ibetihi

Ike gere urum kaji musaruk beluhe

Urum ilmu bewene nge mepat

Wajeb urum sunet nge ibetih ukum menjadi

 

Reff

Sarat Islam ini kuterangan

Itamahan miyen si mubinasanan

Urum ilmu nguk munentong ulen

Betale kelebihen pemikir ni jemase

Enguk bertaligram ari jakarta

Urum urang Banda dum selese we

 

Ari wani kawat nguk temul rara

Pemikiran jema listrik gerele

Demikien kite beribeda

Kati mepat-mepat halal haram menjadi

 

Kedue mubetih suruh urum tegah

Kutape heme Allah dele gere mubuetne

Buet salah gere ne itegahi

Enge napsi-napsi jaman besilose

 

Kubuet jeroh gere ne isuruh

Galep pebebeluh lale kin donya

Jema ulama pe nge berpesan penat

Sikerna umet ger ne ara pemiker ne

 

Reff

Ketige jema gere mubetih

Dup beta isesapih gere belejer wae

Ike gere belejer tengah mude

Arapni Tuhen te kunede jewebpe

 

Male meh nyawape turah belejer

Turah iseder Lailah Haillallah Telkine

Sebeb akherat awah nge berkunci

Anggota kuen kiri renyel munyeritee

 

 

Akherat langso nge meh muke

Segele resie gere tetonen ne

Iatan dunie nguk itonene

Repat wan santon gere sahpe mubetihe

 

Kerna Tuhen si lebih mubetih

Bier wanni waih, waih idegot ne

Yang  keempat munyelat jema

Berbuet pahla gere terengone

 

Gere terengone siberbuet jeroh

Renyel bersesenoh wae muremok ne

Sediken ara buet lagu noya

Nge terang nyata benasa Islam menjadi

 

Reff

Sarat Islam ini kuterangan

Itamahan mien si mubinasan ne

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

A L A M

 

Dele le dele gerel ni alam

Arale opa macam

Pengen gelah selese

 

Wo urang Islam jemasi berimen

Turah isediyen amalan si jeroh-jeroh he

 

Sana kinen artini alam arwah

Artini alam arwah oyale

Sebelum lahir kudunie se

 

Sana kinen artini alam dunie

Artini alam dunie oyale masa besilose

Sana kinen artini alam berzah

Artini alam berzah oyale tempat jema mate

 

Sana kinen artini alam akherat

Artini alam akherat oyale tempat selama-lama

 

Wo alam urum semiyang

Tepang-tepang rerowane

 

 

 

 

 

 

 

 

 

 

Tgk Ali Hasan Aman Suaiba

 

GERELNI NABI

 

Dele le dele gerel ni Nabi

Iwan Qur’an suci nge terang nyata

Sidue puluh lime wajeb ibetih

Gere enguk legih kubewene rata

 

Adam, Idris, Nuh, Hud, Salleh,

Lud, Ibrahim, Ismail, Ishak, Yakub,

Ayup, Yusup, Suip, Musa, Harun,

Elyas, Iliyasa, Julkipli, Daud, Sulaiman

 

Yunus, Jakaria, Yahya, Isa, Muhammad

Muhammad SAW

 

Nabi Ulul Azmi ara lime pake

Pengen gelah selese kati terang nyata

Yang  pertama oyale Nabi Nuh

Sebersunguh mungemang ni agama

 

Yang  kedue oyale Nabi Ibrahim

Si olok yakin muremak ni berhala

Yang  ketige oyale Nabi Musa

Nguk berkata-kata urum Allah ta ala

Yang  keempat oyale Nabi Isa

Sigere berama ijaden Allah ta ala

 

Yang  kelime oyale Nabi Muhammad

Siber mukzizet iyosah Allah ta ala

Sana kinen Mukzizet ni Nabi Enoh

Mukzizet ni Nabi Enoh enguk

Munawos kapalla

 

Sana kinen Mukzizet ni Nabi Ibrahim

Mukzizet ni Nabi Ibrahim gere pangan rara

Sana kinen Mukzizet Nabi Musa

Mukzizet ni Nabi Musa nguk tikone

Menjadi lipe cuala

 

Sana kinen Mukzizet ni Nabi Isa

Mukzizet ni Nabi Isa nguk munorepen jiwe

Sana kinen Mukzizet ni Muhammad

Mukzizet Nabi Muhammad ari jejarie

 

Enguk minum jema

Silebih kaul ilen Mukzizette

Oyale Qur’an sedang sawah ku akhir donya

 

Gerel ni Nabi si due puluh lime

Enti lupe-lupe bier wani nome

 

Tgk Ali Hasan Aman Suaiba

 

SEMIYANG

 

Sana kinen artini semiyang

Pengen gelah terang kati terang nyata

Artini semiyang iwani hukumi syarak

Oyange mutlak munyemah Allah ta ala

 

Kite muloi ari takbiratul ehram

Sawah kusalam turah semperne

Si kerna semiyang oyale kin tiang

Oyale kin batang iwani agama

 

Pengen mi keta cerak ni Rasulullah

Wo heme Allah bewene rata

Assalatu Imaduddin paman

Akamaha pakad akamaddin

Waman tara kaha pakad hadanaddin

 

Bareng sahan jema sisemiyang

Oyange terang muderen agama

Bareng sahan jema sigere semiyang

Oyange terang murusaken agama

 

 

Tgk Ali Hasan Aman Suaiba

 

BERSYUKUR

 

Bersyukur mi kite bewente

Ku Tuhente-tuhente si olok penyayang

 

Ya Tuhen ku si lebih penyayang

Uren urum sidang

Gelep urum terang turun kudonya

 

Ya Tuhen ku si lebih gemasih

Minyak urum waih

Item urum putih bewene ara

 

Ya Tuhen

Si lebih kaul

Iyarane baur mulemah buntul

Ara seba mupaya

 

Ya Tuhen ku si lebih tinggi

Ara gas wani bumi

Minyak lampuni ken penilang rara

 

Ya Tuhen ku silebih mubetih

Ara iken wani waih

Item urum putih bage-bage warna

 

 

 

Ya Tuhen si kaya mutelak

Emas urum pirak

Enge muhayak iyatani donya

 

 

Ya Tuhen ku si lebih pane

Iyarane jema pe

Enge iyature berjejudu rowa

 

Ya Tuhen ku Tuhen si Saturday

Uren urum kuyu bunge lawang

Kacu kin rezeki ni jema

 

Ya Tuhen ni Nabi Muhammad

Meh lakbatat timur urum barat

Penosah ni Allah ta ala

 

Ya Tuhen ku Tuhen ni Jebrail

Atu urum paser one rum kerikil

Kin nepekah ni jema

 

Ya Tuhen kugere silep lale

Dele penosah ne kuatan heme ye

Kati enti nyanya

 

 

Ya Tuhen ku si lebih terpuji

Entan urum besi kayu medangkuli

Taos kin jendela

 

Ya Tuhen ku si lebih mulie

Ulen mata ni lao

Engok semperne ara mucaya

 

Ya Tuhen ku si lebih tinggi

Oya kati inget bes kite ni

Atan deniye ni enti lale kin donya

 

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

TOBATMI TOBAT

 

Emal laha layaqfiru aiyrsraka

Bihi wayaqfiru maduna zalika

Linai yasaa

 

Sesunguhhe Allah gere munampunen dosa mu serik

Sebeb terlebih kotek oya perbuet ne

Dosa-dosa lain iampunen Tuhen

Apabile Tuhen rejen mu maap ne

 

Kune kinen sarat ni dosa si ampunen Tuhen

Gere ara melengkan tobat wae

Sesara jemasi perin bertobat

Ipenuhi tige sarat ipengen gelah selese

 

Yang  pertama menyesal berbuet dosa

Mamur lauh ari mata muningetie

 

Yang  kedue iwani atewe berjanyi

Gere ne munulangi buet singe lepasse

 

Yang  ketige muniro ampun renyel ku Tuhen

Dosa si bueten bu iampunen

Apabile jema benar-benar bertobat

 

Oyala tobat ni Nasuhase

 

Apabila jema tobat Nasuha

Nge terang Allah ta ala renyel munampune

Ketape inget bertobat ku Tuhen

Enti kase melemen dekat emeh kesah

 

Si kerna tobat dekat emeh kesah

Nge terang Tuhen Allah gere menerimee

Jema oya menerime belesen dosa

I akherat baka neraka tempate

 

Sikerna tobat enti melememen

Tengah teger beden perseh matae

Enti harap ken mude ni beden

Sempat ilen porami tue e

 

Mutik ruluh bunge mala

Tentang ni nyawa gere mepat hingee

Entah tengah kunul entah tengah remalan

Entah tengah gegalakkan empat ni kesahe

 

Seba jema gere ara sakiten

Tengah remalan renyel murebah wae

Sakiten sabe ara seba jema

Ketape nyawa gere mera bene

 

Bertahun-tahun wae iwsan sakiten

Nyawa ari beden gere mera mucere

Ara seba jema sawah tue pedih

Gere ne mugigih penome sabe

 

Ara seba jema mokot sakiten

Enge taring tulen mukkowak matee

Oya kati inget berperbueten

Gelah bersimaapan urang iselam se

 

Murip ni urang insen bugelah bersih

Lagu upuh poteh mukilet sabe

Mera wahe iatan dunie ne

Tuhen Ilahi munosah buet ne

 

Singe terang nyata ihari kiamat

Belesen buet renyel iterimee

Terserah ku Allah tentang ni nyawa

Ike nge sawah masa renyel jema mate

 

Ara seba jema iwan perantonen

Iyuweten Tuhen renyel nyawae

Gere jen munyeder wae kutenelen

Nge teger beden galep penome

 

Ara seba jema beluh bermotor

Motor musongkor kuwani karang beluhe

Ara seba jema beluh berkapal terbang

Minter-minter rara ilang-ilang meh mering jemane

 

Oya bewene kite tawakal

Siturahe seber Tuhen munentun ne

Ara seba jema tejem tu berhonda

Iwani paya emeh kesah he

 

Reff

Tobat mi tobat enti lelememen

Ketue beden bene peningeten

Ali Hasan Aman Suaiba

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

APABILE MATE ANAK EDEM

 

Ke anak Edem ulak ku Tuhen

Bier rawan atawa banan

Oya enge potus bene amalan

Melengkan taring tulu perkara

 

Pertama sedekah jeriah

Tengah idenie mera posah-osah

Kumesdjid atawa ku mersah

Mera munosah ku jelen agama

 

Kedue jema mupenane

Ku dirie pemulo iamalne

Meta ku jema pe nise iyejerne

Gere merke munejerri jema

 

Jema si songuh leni pejer-ejer

Ara mu ilmu dabuh iseder

Sehinge jema gere ne suker

Karene punane enge ara

 

Ketige anak amal saleh

Anak si ara mupemetih

Si mutentu berbuet jeroh

Ku ama ine songuh mendoa

 

Amalan silen nge meh hilang

Lagu pasa urum semiyang

Lagu berume urum berladang

Si gere guyang si tulu perkara

 

Hadis kin ini kite kaji

Mumerin jema si nejer ngaji

Lat batat isini denie ne

Muniro ampun ku jema oya

Itoruh ne

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

EDEP SOPAN SANTUN

 

Edep sopan santun iwani semiyang

Pengen gelah terang rata bewente

Pertama tertip alus perasaan

Kerna berhedepen urum Tuhente

 

Yang  kedue mata munerah

Turah ipetetah kumesalante

Yang  ketige pekayan urum beden

Turah ibersihen enti capa-cupe

 

Yang  keempat minum urum mangan

Oya masuk larangan tengah semiyang kite

Yang  kelime kedik urum bersene

Enti cube-cube rata tue mude

 

Yang  keenam kuatas ku kiri ku kuen

Gere nguk munengon melengkan ku musalante

Yang  ketojuh berbuet urum isejen

Gati mungayo beden deletu tume

 

pekayani jema rawan suami semiyang

Engen gelah terang ike sangup kite

Ike nguk berkemeja urum berbulang

Seruel panyang ganti ni upuh kerungte

 

Pekayani kaum ibu pengenku terangan

Seluruh beden enti terbuke

Melengkan salak urum tapak ni kumu

Bertelkung ulu upuh putih ijo

 

Si kerna semiyang

Turah berhedep

Enti silep-silep urang

Islamo o . . . o . . .o . . .

 

 

 

 

 

 

 

 

 

 

 

 

 

 

 

Tgk Ali Hasan Aman Suaiba

 

KITEB SI TURUNI TUHEN

 

Dele le dele kiteb ituruni Tuhen

Ku Rasul pelihen tentang peretongen

Terserah ku Allah ta ala

 

Siwajeb ibetihi ara opat macam

Wo urang Islam enti

Salah paham ipengen rata

 

Itamahan miyen seratus sohup

Enge mucakup enge mu kelop

Enti lohup-lohup kite sama rata

 

Yang  pertama taurat bahasa Ibrani

Iturun ilahi sinteng penadi kin Nabi Musa

Yang  kedue Inzil bahasa syuryani

Oyape iturun ilahi selalu penadi ku Nabi Isa

 

Ketige Zabur bahasa Qibti

Iturun ilahi selalu penadi ku Nabi Daudta

Yang  keempat Qur’an bahasa Arab

Turun ku Nabi Muhammad paleng lengkap

Nge tetap sawah ku akherat baka

 

Siratus sjuhup ituruni Tuhen

Ku Rasul ni Tuhen Nabi pilihen

Kutulu jema

 

Enam puluh sjuhup ituruni Tuhen

Kati kin keterangan kin pedoman

Ku Nabi sjissa

 

Tige puluh sjuhup ituruni Tuhen

Kati kin keterangan kin pedoman

Ku Nabi Ibrahima

 

Sepuluh sjuhup ituruni Tuhen

Kati kin keterangan kin pedoman

Ku Nabi Musa

 

Isi ni si opat kiteb pa

Allah ta ala mendedek jema

Berbuet pahla

 

Nanpe kati jema takut kin Tuhen

Kati ijarakkan buet kusalahan

Kati enti dosa

 

 

Si kerna Tuhen menjadenen

Langet urum bumi

Si munguasai sekeliyen alam ni

Seluruh donya.

 

 

 

 

 

 

 

 

 

 

 

 

 

 

 

 

 

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: