Tgk Mudekala

 

Tgk Mudekala atau yang memiliki nama asli Tgk Abdurrahim Daudy lahir di Kebayakan tahun 1911. Pernah sekolah pada Vervolk School Nangka Kebayakan dan Pesantren Gele Gantung pimpinan Tgk Muhammad Shaleh (Tgk Pulo Kitun). Dalam usia 27 th telah menghasilkan buku Tafsir Gayo yang diterbitkan di

Pada tahun 1954 menjadi Guru Agama pada Perguruan Islam (PI) di Takengon. Sejak tahun 1957 diangkat menjadi Pegawai Negeri Sipil (PNS) dan menjadi Kepala Kantor Urusan Agama Kecamatan Bukit-Nosar sampai tahun 1978.

 

 

 

 

 

 

 

 

 

 

 

 

 

 

 

 

 

 

 

 

         Tgk Mudekala

 

 

         IKE IBETIHKO

 

 

1.       Nabi Muhammad telah berkata                                               munyeder nyata berterus terang

kati enti ummet salah munerka

musalah sangka musalah ramang

 

2.       Ike ibetihko lagu si kubetih

asal tikik pedi kedikmu senang

delen aku mongot siara mulebih

kediken mumetih ko pane munimang

 

3.       Ike ibetih ko sana wan atingku

asal nge tentu temasku kurang

iwan natingku delen sebuku

munerah lagu sentan kupanang

 

4.       Ike kite piker cara biasa

temas urum nyanya barang nge terang

sekalipun Nabi Rasul anbia

enti salah sangka kite perin senang

 

5.       Beda ni Nabi urum kite ni

we demu wahyu kite petelang

benne perintah gere arang mutuni

       gere mutaki suruh urum larang

 

6.       Ike sakit makit urum benger ulu

nise pe demu sakit den senang

ike kerje beru urum kerje balu

nguk perin lagu kerje sembarang

7.       Ara we mangan ara we nome

mejen mulape gere tertimang

mejen we pe berues ate

anake mate luhe remenang

 

8.       I wanni kiteb sipetni Rasulullah

arala basyariah nge tures terang

bedae mien si ara teridah

gere penah pecogah urum pecakang

 

9.       Sipet cerdik mien sara mi

sipetni Nabi si nge terbilang

gere we dungu mengoh kite ni

enta sawah ku tingki dabuh pujejemang

 

10.        Arti cerdik oya bijaksana                                                          nggih penat becara nggih sampe mumang

bier bekune seritni pekara

itose cara dengon cara tenang

 

11.        Sara mi mien sifet amanah

gere mubah-ubah ike itason barang

ike isuruh munyawah ni tenah                                                 pasal mupinah oya si pantang

 

12.        Belem pe we mujadi Rasul

ke sipet betul gere ara unang

ari kucak ni sawah ku kul

gere penah mugumul itos lagang               

 

13.        Cerakni Nabi gelah kite selidiki

tikiken we kedik delenen mongot

 

munerah umet ate we macik

si rusak rasik gere berongot

 

14.        Beramal saleh kurang iperbuat

tape maksiat olok di ko’ot

ike buet salah gere bacar tobat

kuneh Muhammad kin gere mongot

 

15.        Sabung urum judi gere berteduh

renyel bertaroh peng berpunyut

talu ter peng igaral upuh

dum kena sunguh berpantang surut

 

16.        I sonele cerak bercampur demalah

i  sonele sumpah dabuh mukedut

jema si talu atewe susah

si royo kalah lagu si puput

 

17.        Luah ari aya perah mien kurik

ipilih sisik ipanang jangut

ike jangut putih atawa burik

oya gere mersik murah di kuyut

 

18.        Suketni ere gere mera rilip

Gere mera engkip kurang sejemput

Timangni barang sabi pesingip

So cing galip899 ilen pengut-ungut

 

19.        Berlipet gene peng berujung

iperin munulung secara patut

kediken lemem ijelasi untung

oya pe beruntung ku pokok munurut

 

20.        Mumerah rejeki gere berukuren

aman gere ilen sampe mekesud

bermacam lagu itos jelen

gerinem simen jema igegerjut

 

21.        Musyirik ku Tuhen gere berpiuh

gere mera teduh atewe sangkut

we sembahyang nguk parin sunguh

ketape dabuh syirik ikedut

 

22.        Dele pedi ilen pekara mungkar

gere meh iseder secara lanyut

oya kati Nabi ara berunger

kedik seseger si gatine mongot

 

     

 

 

Tgk Mudekala

 

 

  HARAM KU KAUM IBU

 

 

1.             Sahan-sahan ko kaum istri

ku atas suami we putetiro

muniro talak ku atas suami

enta sana kuli gere itoho

 

2.       Keta haram ku kaum ibu                                                                       

nise mudemu beuni serge

patut ipikir ku kaum istri

cerakni Nabi oyale mulo

 

 

3.       Kati beta cerakni Nabi

          nge ara terjadi ara nge contoh

          seba tebi’et ni jema banan

          nise percerakan gere bertaso

 

4.       Urum si rawan baring sana cerak

          nge ujunge talak nise itiro

          sentan mudemu gere ara len

          turah iceren aku besilo

 

5.       Jema si rawan dabuh-dabuh silep

          kerna  tiep-tiep hampir jep lo

          male mungadu gere ara langkah

          sebeb nefekah gere gantung malo

 

6.       Udah kati ara beta nise buet

          jema i deret udah ara mungaco

          macam akal jema munaduk

          kenemni kuduk ku we iango     

 

7.       Banan oya pe nge galak orok

          sebeb mugedok isini puro

          meh kemokotne jema we cere

          sebeb sabi-sabi ipasung ojo

         

8.       Kediken beta buet ni istri

          geh kene Nabi payahle mayo

          enti mulo serge nise mudehu

          sedangkan beu nise belayam lanyo

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

         Tgk Mudekala

 

 

         SEBER KIN BELE SYUKUR KIN NEKMAT

 

 

1.       Baring sahan si gere seber kin beleng-Ku

          nanpe gere syukur jema oya kin nekmat-Ku

          kete enti mowen jema oya i atani buming-Ku

          nanpe enti belongoh jema oya i tuyuhni langit-Ku

 

2.       Gelah isemahemi keta Tuhan lein ari Aku

          gelah iperahemi keta Tuhen tempate besilu

          wo bene heme Allah

          kusi kite perah lain ari Tuhen

 

3.       Pedehal Tuhen tempat bersilu

          gere ara demu selain ari Tuhen

          pedehal Tuhen munaran langit bumi

          urum lengkap ni isi nggih ara bandingen

 

4.       Sebeb ni Tuhen kati mujangkit

          berperi sakit ki kite insen

          bele gere seber nekmet gere syukur

          murah pedi kufur kite ku Tuhen

 

 5.      Arti bele sudini Allah

          iosahe nemah si jatuh ku beden

          pemuloe ara pemarine legih

          mejen beremeh ni kite kekayaan

 

6.       Oya keta wajib kite seberi

          dengan tetap hati baring sana cubeen

          enti sentan miskin renyel kite gunah

          sang-sang gere penah iosahi Tuhen

 

 

7.       Seba beribedet renyel berteduh

          munyumpahi tubuh munyerapai beden

          aduh palise tubuh si mulemas

          gere penah temas sabi wan kenyanyan

 

8.       Arti nekmat pemberian- Allah

          si bernama penosah ki kite insen

          pemuloe legih pemarine ara

          ibarat kaya kite ibubun Tuhen

 

9.       Keta wajib kite berterime kasih

          pudaha a legih se nge ara puren

          berhati syukur gere terhemat

          memuji kudrat kuasani Tuhen

 

10.     Enti sentan kaya renyel kite pongah

          penosahni Allah sang-sang kite lupen

          bercerak jengkat berperi tekebur

          sang-sang lagu bur nge kite jujungen

 

11.     Seba beribedet renyel berede

          galip berkekire sidah nge kekayaan

          seba zakat pe gere penah iosah

          pedehal nge sawah due belas bulen

 

12.     Patutle kite ikini Allah

          beluh menyembah ku lein Tuhen

          patutle kite asal kona peri

          ari a tani bumi kite itangkuhen

 

13.     Patutle kite asal kona jangkit

          ari uyuhni langit kite iusir Tuhen

          ulakmi kite keta ku kebenaran

          geh kene Quran afala ta’qilun

 

 

 

 

 

 

 

 

 

 

          Tgk Mudekala

 

 

           ADAB MINUM

 

 

1.       Wan sara hadis rawahud Dailami

          ara icecari perkara adab

          sungune nge berkata Rasulullah

          iterangne tegah ku bene umet

 

2.       Apabile ko muminum weis

          gelah tikik-tikik ningko idolot

          enti ienumko ningko weisa

          enti sampe keta minum mudegot

 

3.       Minum mudegot munyakitni jantung

          ate mugulung rasae pedet

          gelah ipatih carakni Rsulullah

          gere iosah minum mudegot

 

4.       Minum mudegot mucampur kuyu

          weisni labu tangkuh mulumpet

          buet lagu noya ara kite cube

          selagu kite ulak ari buet

 

5.       Ari kerna gerahan gere ipeduli

          cerakni Nabi gere ne kite inget

         

kin penyakit jantung gere ne terih

          perin tulenni weih nge salah dolot

 

6.       Pedehal weis gere mutulen

          iosah Tuhen sipete lemut

          ike kerna minum seger berkesah

          ari kerna gerah kati mudegot

        

 

 

 

           Tgk Mudekala

 

          GELUMANG TUJUH

 

1.       Gelumang tujuh ini kuseder

          kin inget-ingeten gelumang pitu

          sara pepatah ini kuperin

          ku atas pemimpin baring sahan tengku

 

2.       Gelumang pitu turah irasa

          ku atani jema si mujadi ulu

          yang pertama rugi belenye

          nan pe yang kidue beden payah demu

 

3.       Yang ketige kone petenah

          keempat mutamah buet diri padu

          yang kelime we kona caci

          keenam menjadi we berate karu

 

4.       Yang ketujuh ideye setan

          depet ujien we kona gangu

          si pitu perkara turah irasa

          oyale makna gelumang pitu

 

5.       Si pitu perkara kelepas ilewen

          selamat berjelen mungayoh perau

          kebaring sana ara pepakaten

          we ibubuh kin kepala ulu

 

6.       Semisel jema mujadi reje

          torah icube gelumang pitu

          mujadi reje olok pedi sakit

          merasai peti lagu lempedu

 

7.       Memikiri rakyat wanni kampung

          kune kati beruntung kune kati maju

          mujadi ulama olok pedi susah

          mu depet tomah jema si berilmu

 

8.       Mumikiri murik kune kati pene

          berpedih ate munupangan dagu

          munehen tuduh ari kuen kiri

          selagu Nabi i masa dahulu

 

9.       Konotni cerak singketni peri

          ike mujadi kin kepala ulu

          kebaring sahan jema manusie

          turah icube gelumang pitu

 

10.     Ike gere beta nguk iperinen

          gere jadi ilen kin kepala ulu

          beta kedah mulo kalam peringeten

          se kusawahen baring sahan tengku

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Mudekala

 

 GELOMBANG TUJUH

 

 gelombang tujuh ini kuceritakan

 gelombang tujuh jadi ingatan

 satu peribahasa ini kusampaikan

 kepada tengku dan para pimpinan

 

 gelombang tujuh musti dirasa

 oleh manusia para pemuka

 yang pertama rugi dana

 yang kedua badan lelah jua

 

 yang ketiga berharap kesana

 keempat kerja bertambah jua

yang kelima dia dicaci pula

 keenam hatinya gundah gelana

 

 yang ketujuh diganggu setan

 dia diganggu itulah ujian

 tujuh hal ini musti dirasa

 gelombang tujuh itulah maknanya

 

 tujuh hal ini kalau bisa dilawan

 mendayung perahu selamat berjalan

 kalau ada yang dimufakatkan

 dia diminta jadi pimpinan terdepan

 

 semisal orang jadi raja

 gelombang tujuh musti dicoba

 sunguh sulit jadi raja

 pahit empedu akan dirasa

 

 memikirkan rakyat didalam kampung

 bagaiman agar maju dan beruntung

 sungguh berat jadi ulama

 mendapat keritik dari cendekia

 

 memikirkan murid supaya berilmu

 merenung sambil bertopang dagu

 menerima tuduhan dari kanan kiri

 bagai Nabi di zaman bahari

 

 pendek kata, pendek kata

 kalau jadi pemuka

siapapun manusianya

 gelombang tujuh musti dicoba

 

 kalau tak begitu boleh dikata

 belum boleh jadi pemuka

 begitulah kalam untuk diingat selalu

 kini kusampaikan kepada para tengku

 

 

 (Terjemahan dari bahasa Gayo oleh L.K. Ara)

 Mudekala

 

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Mudekala

 

MUKALE

 

 Wan sara hadis berkata Rasulullah

 munerangan tuahni jema si mukale

 jema mukale urum si kalei

 Nabi berjanji sara wa tempate

 

 Wan syarat imen ara isebute

 turah mukale kin si lime bagi

 yang pertama mukale kin Tuhen

 kedue bilangan mukale kin Nabi

 

Keta ketige mukale kin malaekat

 yang keempat kin kiteb suci

 kelime mukale kin si berimen

 turah berejen mukale kin wali

 

 Mukale kin Tuhen berbuet ibedet

 osahe manfaat langit urum bumi

 mukale kin malaekat gere teridah

 jema si bertuah mukale bersuci

 

 Mukale kin Nabi mengikut suruh

 gelah bersunguh i wanni ate

 sabi si berimen turah mukale

 kati berdedele kite umet ni Nabi

 

 Abu Bakar mukale kin Muhammad

 we pertama umet kin khalifah Nabi

 peteri Zulaikha mukale kin Yusuf

 ikaleie Yusuf sebeb karena nipi

 

 Peteri Bulkis mukale kin Sulaiman

 munaringen kerejen mukale kin Nabi

 kin Nabi Muhammad mukale Khadijah

 meh kin sedekah reta wanni peti

Tgk  Mudekala

 

 RINDU

 

 dalam hadis Rasulullah berkata

 menerangkan rezeki orang yang rindu

 orang yang rindu dan yang dirindu

 Nabi berjanji hanya satu tempatnya

 

 dalam iman ada disebutnya

 rindulah pada yang lima

 yang pertama rindu pada Tuhan

 yang kedua rindu pada Nabi junjungan

 

 yang ketiga rindu pada malaekat

 yang keempat rindu pada kitab suci

 yang kelima rindu pada yang beriman

 sungguh -sungguh rindu pada wan

 

 rindu kepada Tuhan mengerjakan ibadat

 diberi-Nya langit dan bumi yang bermanfaat

 rindu pada malaekat tak kelihatan

 orang beruntung rindu suci diinginkan

 

 rindu pada Nabi ikuti petuahnya

 bersungguh-sungguh di dalam dada

 selalu rindulah wahai yang beriman

 berbondong-bondong kita umat Nabi junjungan

 

 Abu Bakar rindu pada Muhammad

 umat pertama khalifah Nabi

 putri Zulaika rindu pada Yusuf

 rindukan Yusuf karena mimpi

 

 putri Bulkis rindu pada Sulaiman

 rindu pada Nabi kerajaan ditinggalkan

 kepada Nabi Muhammad rindu Hadijah

 harta dalam peti habis buat sedekah

 

 (Terjemahan dari bahasa Gayo oleh L.K. Ara)

 

         Tgk Mudekala

 

         DUNIE AKHERAT TURAH TEPANG

 

1.       Nabi Muhammad nge mularang

          gere iosahe timpang turahe tepat

          lingni hadis si patut itimang

          kin pemanangni kite ummet

 

2.       Gere jeroh ko munaringen denie

          karena seje sebeb akherat

          itaringen akherat karena denie

          oyape gere nguk iperbuat

 

3.       Si lebih jeroh geh kene Nabi

          ini urum ini Nabi berisyarat

          ini urum ini siyarat Nabinte

          pertama dunie ni kedue akherat

 

4.       Sungune dunie oyale perau

          oya kin penegu beluh ku akherat

          nan pe sungune bu enti ko ara

          ku atani jema mujadi pembarat

 

5.       Tentangni muripmu berpangung ku jema

          sebeb karena oya jema pe penat

          sebeb kerna ko jema pe sungkuh

          mari-mari teduh jema berbuet

 

6.       Nge tures terang nge sareh selese

          ngele kite penge perini Muhammad

          dunie akherat turahe tepang

          gere nguk timpang turahe tepat

 

7.       Ibueten dunie dengan bersunguh

          oya kin peneguh tiang akherat

          arti dunie ngeke faham kite

          berempus berume berniege mekat

 

8.       Beluh tung upah mumangan gaji

          mujadi kuli oya ibarat

          kolakni lout luesni bumi

          pintuni rezeki gere galih mepat

 

9.       Oya bewene perkara denie

          kin jelente beluh ku akherat

          olok pedi bengis Nabi munyerapa

          ku atani jema tubuhe sehat

 

10.     Tentangni muripe berpangung ku jema

          baring sana-sana ku jema terberat

          bening saning berengot seje

          lagu manusie jema si cacat

 

 

 

 

 

 

 

 

 

 

 

 

 

 

 

 

 

 

 

 

 

 

Tgk Mudekala

 

Kisah Nabi Daud

Salah satu kejadian dimasa Nabi Olah

Daud SWA

 

Allahamdulillah mulo kusebut

Masa Nabi olah Daud sara cerite

Ulu nikisah menurut maksud

Nume nabi olah daut simale ibaca

 

Dalam sebeta tikik kuseder

Keti depet benyer keti paham makna

Keti seleseh mutamah sareh

Kete perseh mutamah nyata

 

Istri ni Daud sembilen puluh sembilen

Urum ine ni seleman 100 jema

Umur ni Daud I bagi tulu

I bagi waktu isipet masa

 

Sara bagi munukum ni manusie

Bagi kedue tobat haba’ah

Bagi ketige kite ni tabi

Urum istri begalak raya

 

Nabi Daud laing nge temas

Lagu si mulemas sembilang poa

Munurut tareh ike pasal laing

Grara bandeng seluruh donya

 

Manuk temerbang renye mutauh

Ulung kayu ruluh tampukke mala

Waeh mujaril gerene manut

Mengen timah lemut mulipet suara

 

Ike jema banan nge sawah umur

Dele nge genyur sampe meh nyawa

Pada sehari mukamul rakyat

Ikaji suret jabur I baca

 

I mulunne I boboh he sintak

Dum sigalak rakyat jelata

Sediken waktue nge ara mujem

Nge dabuh denem rakyat murasa

 

Pada sehari bermohon rakyat

Hukum kiamat kune kin cara

Nabi daut I sone bernyaji

Musapat seger mi boh mi keta

 

Enti taring maring kaul urum kucak

Kubelang kolak rempak musara

Gelah inantin ko tulu laumi

Isone pasti teridah nyata

 

Orop ini teduh mulo kisah

Dedang sawah munampinnen masa

 

Seorang sudeger kehilangan sapi

 

 Ara sara jema mosop lemu e

Gere mera demu nge pe ikenali

Jema oya terbilang toke

Harta e dele kaya penadi

 

Ibani Israel wae termashur

Barat urum timur wae tepuji

Perasinni toke bani israel

Sipette kikir ucit penadi

 

Dom dele ni lemu koro urum kude

Deleni unte kaming bebiri

Binatang I bilang nge sadur mede

Sehingge gerene terbilangi

 

Meh kedelenne oya harta

Sinting ara sara lemu igalaki e

Lemu oya sine olok di jinak

Bedenne rancak limus penadi

 

Sentan iolau renye geh kumah

Sebeb ngeramah geredaleh irai

Dom kul niate iboboh pakayan

Emas urum entan mutamah belangi

 

Tanuk ni lemu boboh bersalup

Beden ikelkup urum sutera puji

Kati cerakne arap jema dele

Sediken lemue ike ikunahi

 

Sahan mungunahie renye iukum

Grara ampun iukum mate

Beta le cerak iosah arah

Jema mungunah gerene beranyi

 

Maklumle penghulu sara jema kaya

Tentu ara jema murasa sei

Pada sara waktu lemue osop

Tukke pe silep tekedir ni ilahi

 

Isone ate gere terumpaman

Gere bemangan enge pien laoi

Pues mumerah gere mera depet

Iosah maklumet kujema rami

 

 

Sahan mudemue oya lemungku

Ninse demu hadiah gaji

Orop ini kuteduh kisah

Dedang sawah kulaen kukaji

 

Orang tua yang miskin dua beranak.

 

Ara sara jema I nenggeri sam

Kin diringni uten I deret ni kute

Jema oya sine anakke rawan

We jema banan lagi nge tue

 

Oya roanne jema melarat

I jarak ni temat ari manusie

Sekalipun wae jema mularat

Berbuet ibedet kelem porak lau

 

I tempat oya olok disengap

Jarang jema rap gaeh beseje

Lao pe terang cico ni manuk

Laope reduk mukni imo

 

Sentan iyo lau mulaing kerudik

Mulaing seset wan iyo lao

Sengap lelungunen rasae isone

Malang niseppe nge beta teniro

 

Arap numahe murip batang kayu

Asal ngetentu batang ni gelime

Sentan soboh lau timul roa uah

Oya kin nepekah anak urum ine

 

Mugeleng rohul nge muah mien

Oya kin makanan kin ganti ni kero

Demikien nasip berbilang ulen

Bertahun tahun betawe seje

 

Arap ni umahe ueh ner

Ueh mupencer itos kin telege

Demikien nasip terbiang ulen

Bertahun tahun beta we seje

 

Pada sehari geh kene anak

Renye becerak wae ku ine

O inengku kene anakke

Gelime sabi aku nge lege

 

Gelime sabe si kite panan

Lain makanan gere penah icube

Maklum le anak si kurang akal

Cerak derhal derhal si kurang kekire

 

Wo anakku jema si muah

Nikmat ari Allah turah iterime

Nge beta pe turah kite insep

Ujut ne osop uah ni gelime

 

Tekedir ni Allah tuhen kuasa

Gerene mera muah gelime

Anak urum ine aduh nyanyae

Aduh nyanyae mulape ni tuke

 

Roa lau gere bemangan

Nge beta tekedir ni tuhen nise teniro

 

Keduanya didatangi oleh seekor Sapi

 

Bilangan sijeroh ketike sibise

Makul doa e ku tuhen satu

Jarak siteru berbele selese

Minter nge gaeh kone sara lemu

 

Lemu oya renye becerak urum delah paseh

Niro I gelih besilo aku

Enti ko takut enti ko gentar

Aku nge halal kin rejeki mu

 

I sone jema tue a nge dabuh pecengang

Gere penah binatang bercerak

Tengah pupececengang ate berkekire

Sana die bele male geh kuaku

 

Perempat ni hek mutamah lape

Lemu I geleh ne iuwet ne luju

Renyel ijantar seba I pangang

Kurara ilang deba I tunu

 

Tekedir ni Allah geh sara jema banan

Ku kediring ni uten munango kayu

Jema oya berutem geh ari kute

Nge tibe tibe ku sone mutuju

 

Ari si jarak nge I rasae

Bau ni dengke sitengah itunu

Bau ni dengke nge muep uep

Bewenne sedep lagu dengke ni lemu

 

Jema banan oya ne munepati langkah

Renye sawah kumah ni banan balu

Sebeb atewe nge ara bedetik

Nye bidik bidik munueten pumu

 

Boh keta uwin kuro nine

Gelah mungne keta aku

Sikerna jarakni enti kase minah minah

Seolah olah peri e mutentu

 

Dengki ni sana sitengah ipanang

Si tengah ijerang seba itunu

Jema tue mujeweb terang

Si tengah ipangang dengki ni lemu

 

Lemu oya sine ku ini gaeh

Niro I gelih ku aku tuju

Ari sihen geh ni lemu gere ku betih

Enti kite mulelih kerna Allah natengku

 

Kerna sana keti kami gelih

Lemu munyapih ku kami tumpu

Cerak ni lemu nge pehalal halal

I gelih mi renyel besilo aku

 

Banan si mungune ngepebebening

Singkih ni kemiring aguk ni ulu

Kulit ni lemua si bekune rupe

Turah ituruh ni ine besilo ku aku

 

Jema tue munuruh ni kulit

Gere sulit sulit gere silu silu

Bana si mungune ulak renye bacar

Renye berunger ku toke mungadu

 

Gere I pelejeri ninse hukum

Munuruh ni ojom ku toke mungadu

Kena muharap hadiah depet

Munuruh maklumet ninse mudemu

 

Sentan sawah renye becerak

Gerejen alak ninse I sapu

I seder ku toke peri ngulunak

Sire becerak I depok pumu

 

Toke penghulu babit munentong

Renye munentong bukti ni lemu

Nge tures terang saleh selese

Male I unuh ne oya banan balu

 

Bibir ni toke nge mugerak gerak

Kenak ne bedepak renyel kumu

Prasan ni atewe lagu singe giging

Sebeb nge taring buet gere demu

 

Tangkuh ni cerak sirume rume

O banan tue nusuhi lemungku

One jema tue dabuh beserah

Kepada Allah renye betungku

 

Gere nguk becerak sepatah

Nge sawah ku bilah nge tumpu ku dagu

Toke penghulu ulak renye surut

Ku nabi daud Beluh mungadu

 

Ku nabi daut iseder berite

Sara jema tue munusuhi lemungku

Urum anakke sara jema rawan

I kediring ni uten I tempat Anu 

 

Menurut kenakku gelah I unuh

Keti rusuh negeri resu

 

Nabi Daut memanggil orang tua itu hendak didamaikan dengan toke

 

Nabi daut mungini talu

Banan si balu urum anakke rawan

Nge beta roanne nge sawah ku nabi

Rnyel ikunei tentang perbueten

 

 

Nge beta roanne renye munyeder

Munurut benar ninse perkataan

Nabi daud beperi ku toke

Male I mahe dame urum jema banan

 

Geh kene nabi enti mi pekara

Gelah aku keta mubayar kerugian

Bagi nipekara nge maklum toke

Murusak ni ate we kase puren

 

Seratus derham bir kupenghulu

Kerna lemu nge iunuhen

Lebih kuange I panang ko aku

Gere sidah pe lemu oya siaran

 

Cerak ni toke sekakar

Cerak kasar renye itangkukhen

Aku gere mera itetah dame

Gelah sibenare kami hukumen

 

I cerak ni tokea nge sunguh sunguh

Enti I cemeoh ini jema banan

Musaut mien nabi olah daud

Dengan timah lemut mameh ge musantan

 

Gelah ku bir ni toke ringit

Sepenuh kulit nilemua mien

Toke israil gere munerime

Ike beta seje we ninse hukumen

 

Isone toke atewe nge mujebu

Muninget kin lemu urip oripen

Lagi ara bengis niatengku

Perin ne lemungku niro igelihen

 

Mustahil lemu pane becerak

Itaos lepak si bukon bukon

Ara ke patut arake layak

Lemu becerak menurut pikiren

Aya keti aku gere mera dame

Gelah sibenare kami hukumen

Ike menang pe menang ketalu pe talu

Gere ne atengku mupekekiten

 

Nabi olah daut minta tempo

 

Nabi daut munerime kata

Boh mi keta oya pe jeroh

Lagi pun lang jema musapat

Hukum kiamat male I turuh

 

Keti betihe bewenne rakyat

Hukum kiamat kubelang mutempo

Rawan banan enti taring mareng

Keti penge laing betul ke sunguh

 

Pekara ini lang I putus

Keti seger gus ku tiro tanguh

Nge beta lang na jema muhimpun

Muduyun duyun ku belang mutimpuh

 

Kaul kucak kone musapat

Bewenne rakyat ku sone beluhe

Bewenne denem kin hukum kiamat

Betul ke tepat sinting ke sunguh

 

Musapt mi jema luer biasa

Gere penah beta bewenne belum

 

Nabi mulai berbicara

 

Ngetepat ngsawah tek

Nabi naik ku atas mimber

Ikeldep ne jabur gerel ni kitep

Ibaca e ayat laingge muteger

 

Lagu pengajin urum basa diri

Kune terjadi beta I seder

Laing ni kaji nge mulelemas

Lainge temas rakyat tepekur

 

Nguk I umpama laing ni bensi

Ibarat repai mejen mumepar

Mejen ngongong lagu gegoyong

Mejen mudengung lagu sigempar

Laing ni daud gere tercunto kite

Puren urum mulo oyape gemar

Jema mumenge nge sengep lelungunen

Munyimak lagu lagu sigempar

 

Gere mera sengalan jema simumenge

Sebeb lague lagu sitatar

 

Nabi Daud mubayangkan persengketaan

hal lemu dan pembunuhan   

 

Nge beta turun renye malaikat

Nosah ilamat ku nabi olah daud

Gelah ituruhne hukum kiamat

Keti bewenne ummet murasa tekejut

 

Perihal lemua pedi I seder

Iosah keber keterangan lnjut

Sahan sibenar sahan si salah

Isien teridah si tukang liput

 

Nge beta daut renyel benyanyi

Kurakyat rami renye munyebut

Ku ceriten hukum kiamat

Ari akhirat sigere luput

 

Renyel teridah benar salah

Bewenne Hemme Allah turah takut

Sikerna ini ara pekara

Ara tikik dawa rap male gasut

 

Hal ni ine ni urum penghulu

Pasal lemu rap mele ribut

Sikerna akani pihak terdakwa

Dan tokeha pihak penuntut

 

Ini kuperin kuko rakyat

Hukum kiamat gere nguk gasut

Jema si mungadu gere mera menang

Jema si malang keta mulo manut

 

I uke perihal iseder berita

Renyel berkata nabi olah daud

 

Inenggeri Sam ara sara toke

Harta e ele asal nume wayang

Ara sara jema beluh ku mesir

Secara musafir beluh mununang

 

Betale buet sudeger toke

Harta si dele munemah barang

Buet ni toke jeroh penadi

Keso kini lagu ja unang

 

Seger berangkat toke berkemas

I emahe emas gere terbilang

Penemah ni emas lime ratus unte

Nge sadur mede lagu kalung memang

 

Beluh oya sine imahe sara kuli

Si mumengan gaji ara seorang

Renyel toke munangkap langkah

Beluh ari umah ku mesir berdagang

 

Tekedir ni tuhen nge gerak ni Allah

Tuk ke pe nge sawah ku lah ni deni

Konot ni cerak singket ni peri

Renyel kuli mununuh ni toke

 

Maklum manusie kurang sopan

Mayat iseebun kuwan ni one

Nyawa iuten harta I mai

Buet ni kuli beta sidelenne

 

Renyel kumesir kuli berlangkah

Perasaan gagah mujadi toke

Empat puluh hari dong I mesir

I barat musapir munyenangi ate

 

Deleni barang bermacam macam

Ulakku sam mah barang dele

Buet ni kuli nge kaya raya

Mumikir ni harta dum dele we

 

Nabi Daut menegas kan hukum kiamat.

 

Ini kuseder secara tepat

hukum kiamat ini kukaji

Sahan si mununuh sahan si mate

Cube ipenge ini kucari

 

Jema simate rawan ni akaha

Munarengen harta dele penadi

Jema si mununuh oyale tokeha

Keta pudaha wae kin kuli

 

Hukum kiamat ini nge terang

Gere ara segan dan gere enguk temuni

Si kerna lemu enge kona geleh

Oya gere daleh ne ibayari

 

Sebeb akaha empuni hak

Pusaka kin anak urum istri

Oya terange hukum kiamat

Baring sahan umet gere enguk temuni

 

Si hukumen ara roa pekara

Pasal harta ulak kembali

Yang kedue toke menganiyaya

Munueten nyawa rawan ni akani

 

Oya pe mien turah I hukumen

Toke iunuhen gere i peduli

 

Isone toke enge pesesumpah

Oya gere penah oya buet ku

Jema oya tekedir ni Allah

Mukancing awah gere enguk bersebuku

 

Renye becerak ninse kumue

Urum kidingi ninse mungadu

Segele buet betale peri

Kune terjadi masa dahulu

 

Geh kene kiding aku remalan

Geh kene tangan aku munyebu

Toke penghulu gere enguk ne becerak

Harta ulak ku atas empu

 

Isone rakyat teba besebak

Ara sibesepak ara si munungkoken ulu

Isone rakyat teba nnguk dekat

Sana keti bercerak kiding urum ulu

 

Dele rakyat si bersurak surak

Hukum kiamat betul selalu

Isone daut renyel munyuruh

Toke I unuh sekarang waktu

 

Renyel rakyat murasa pues

Gere ennuk cules bewenne demu

 

Ini kisah kuk kao muslimin

Ku kaum mukmin kaum suderengku

Hukum kiamat gere enguk kuneh kenak

Gere kune galak menurut nafsu

 

Beta rupen hukum kiamat

Baik dan jahat gere musebu

Hukum kiamat bewenne teridah

Teles jeroh bier bet kisu kucakke

 

Bewenne kite ni renyel rakyat

Hukum kiamat gere enguk etipu

Ike ara dosa tetir renye tobat

Keti osah tuhen renye rahmat Allah ya tuhen ku

 

 

Iklan